واع / افخاي أدرعي.. إعلامي العدو اللي فهمنا أكثر من نفسنا!/ آراء حرة / بقلم : عتاب بغدادي
يعني بالله، واحد “عدو” مثل افخاي أدرعي، يتكلم لغتنا، يحفظ أمثالنا، ويعرف شنو قاعد يصير بينا على السوشيال ميديا أكثر من خالتي أم حسّان! يطب علينا بكل ثقة ويكول: “قالت العرب…” ويفتح الحكم والأمثال، ويحلل بيئة الجنوب والضاحية والنجف والموصل، وكأنّه طالع من ديوان عشيرة!
الرجّال ما يسب، ما يهوبر، ما يزعل، بس يجي ويقنعك بالمنطق والدليل والابتسامة… لا وكأنه يقره من ورقة وزارة التربية! يقارن بلده اللي متوحدة ومضبطة وضعها، واحنا نتذابح على منشور، ونشتم على كومنت، ونتعارك على فلان تابع منو! تاج راسك وتاج راسي 🫏
أدرعي بعيد الاستقلال طلع فرحان، يتباهى بازدهار “إسرائيل” ويشكر وحدة شعبه، وإحنا؟ إحنا نفتتح موسم الفتن كل يوم، سباق ماراثون بالشتائم الطائفية، ومزايدات وطنية عالفاضي!
الفرق بينا وبين أدرعي؟ هو عدونا… بس يعرف شلون يكون خصم ذكي، وإحنا عدونا الأول هو نفسنا وصوتنا العالي اللي ما يوصل غير للطرمة!
تره مو عيب يكون عدوك ذكي… العيب إن تبقى إنت غشيم!
إسرائيل ما تشتغل بعشوائية، كل حركة محسوبة، كل بوست محسوب، تراقب مشاعرنا قبل كلماتنا، تعرف شنو يفرحنا وشنو يذبحنا، وتشتغل عالشروخ إللي بينا مو بالصواريخ، لا… بالحسابات والوعي الجمعي واللايكات!
وإحنا؟ نكول “المؤامرة كبيرة” ونرجع نكمل الردح عالتعليقات.
افهموها يا جماعة، إسرائيل ما تحتاج تقصفنا… دام إحنا كل يوم نقصف أنفسنا بالكراهية والغباء والعصبية والفتنة!
وإذا ما فزّينا من غفلتنا، فراح نكعد يوم نكتشف إن أدرعي مو بس فهم لهجتنا… فهم نفسنا، وسابقنا بخطوة بكل شي!
ضلو ضلو تاج راسك وتاج راسي وهما دا يتغلغلون اكثر واكثر مدا تفهمون ان سلاحهم على مر العصور (فرق ..تسد ).
اكثر من ٧٧ سنه كل جمعه ملتهين ندعي على اسرائيل الله يهجمها وهما ملتهين يطورون نفسهم ويتقدمون بتكنلوجيا ..وحنا باب النواب نكعد نجدي الي احنا انتخبناهم نجدي نشحذ نشحذ الراتب والتعين والاجارات والكهرباء .شعب مغيب وين العقول النيره وين؟
